L’Institutu Asturies 2030 abre’l debate, dende la perspectiva feminista, sobre la xestación subrogada nes xornaes La Maternidá Contratada

Los díes 26, 27 y 28 d’abril personalidaes de reconocíu prestixu nel ámbitu del derechu, la filosofía y l’activismu van abordar esta cuestión nel alcuentru que se celebra en Xixón

Los díes 26, 27 y 28 d’abril celébrase en Xixón l’alcuentru La Maternidá Contratada entamáu pol Institutu Asturies 2030, unes xornaes sobre la xestación subrogada coles que se quieren esclariar duldes y interrogantes sobre un asuntu complexu y controvertíu dende’l puntu de vista llegal, económicu, políticu, social y éticu. De too ello va a falase dende una perspectiva feminista. L’alcuentru principia’l xueves 26 con una visita guiada a l’amuesa La Casa Tomada. Conquistando el espacio doméstico, del Colectivo Offmothers en LABoral Centro de Arte y Creación Industrial y el vienres y el sábadu van desarrollase nel Centru Municipal Integráu d’El Llano. Les xornaes son abiertes a tol públicu y de baldre, y va a disponese d’espaciu de conciliación mentes se celebren.

“Cuestiones como si se fae de les muyeres incubadores naturales, si val esta opción pa formar una familia, el “derechu a procrear” o’l turismu reproductivu van ser dellos de los asuntos que se van debatir dende’l rigor con persones espertes del Derechu, la Filosofía y la Ética, asina como activistes y representantes de colectivos feministes”, adelanta Laura Tuero, coordinadora del Institutu Asturies 2030.

Dende’l Conseyu Asesor del Institutu Asturies 2030, Ana López Chicano, pedagoga, esperta n’infancia y mocedá y xestora cultural, y Diego Álvarez, profesor de Derechu de la Universidá d’Uviéu, dos de les persones qu’echaron alantre les xornaes, detallen l’oxetivu de les mesmes: “Axuntamos los términos maternidá y contratu: ¿qué entendemos por maternidá? ¿ye posible someter la maternidá a contratu? Pa responder a estes preguntes va cuntase con persones espertes en dellos campos tocántenes a este asuntu y, como si fuera un Filu d’Ariadna, los sos conocimientos van ayudanos a salir d’esti llaberintu que ye la xestación subrogada”, indica López Chicano.

“La xestación subrogada ye un tema abegosu que necesita d’una reflexón detenida y serena dende diferentes perspectivas y por eso entamamos el panel d’actividaes d’una manera interdisciplinar con espertos y espertes d’estremaos ámbitos”, añede Diego Álvarez. Asina, dende l’ámbitu xurídicu va cuntase cola presencia de Manuel Atienza, catedráticu del Filosofía del Derechu de gran prestixu nacional y internacional, y María Martín, profesional del derechu con una trayectoria destacada como abogada feminista y cofundadora de l’asociación Abogadas por la Igualdad.

Dende la perspectiva bioética tamién apuéstase por perfiles complementarios: d’una parte va tar Inmaculada de Melo, filósofa, profesora d’Ética Médica nel Weill Cornell Medical College de Nueva York y “una de les voces más respetaes a la hora de tratar dende’l puntu de vista de la bioética’l tema de la maternidá subrogada”, en palabres de Diego Álvarez. D’otra va tar Natalia Fernández Jiménez, profesora collaboradora del Departamentu de Filosofía de la Universidá d’Uviéu que ta centrando les sos investigaciones na maternidá, la sexualidá y les nueves tecnoloxíes.

Al empar, dende’l feminismu, de les formes nueves de familia y el movimientu LGTBI va cuntase con Beatriz Gimeno, activista, feminista y escritora, y Mané Noriega, coportavoz y responsable de los asuntos tocantes a identidaes, transexualidá y transxéneru na Federación Estatal de Lesbianas, Gays, Transexuales y Bisexuales, y coordinador del Aria de Transexuales del colectivu Xente Gay Astur (XEGA).

D’otra manera, amás de la visita’l xueves 26 a la esposición Casa Tomada del colectivu Offmothers y la mesa redonda con artistes del colectivu, el vienres 27 abre les xornaes nel CMI d’El Llano Silvia Nanclares, activista cultural, escritora, locutora del programa de radio Carne Cruda y autora del llibru ¿Quién quiere ser madre? (Alfaguara, 2017) que va falar de la xestación subrogada y el cambiu social.

“Hai un debate abiertu sobre la xestación subrogada nel que ye clave analizar cuál ye’l papel de les muyeres. Ye necesario falar y debatir a nivel de cai y a fondu cuando yá hai propuestes pa la so regulación nel Congresu”, alvierte Laura Tuero.