El Premiu Institutu Asturies 2030 d'Ensayu abre un espaciu nuevu pa la reflexón crítica

L’Institutu Asturies 2030 presenta una iniciativa nueva, el Premiu Institutu Asturies 2030 d’Ensayu, col que quier dar puxu al pensamientu críticu: “Buscamos voces que nos ayuden a problematizar los retos de la nuestra sociedá y respuestes a problemes que son urxentes, como la crisis de trabayu, la socioambiental, les desigualdaes de xéneru…”, esplica’l sociólogu y escritor César Rendueles, presidente del Institutu Asturies 2030.

“Hai fame d’esta triba de reflexones, de pensamientu críticu y, mesmamente, esto rescampló nos últimos años al espoxigar un aquel los llibros d’ensayu. Sicasí, munches veces pa les editoriales comerciales ta malo de tirar por autores o títulos arriesgaos o por novedaes. Por eso nos abultaba qu’un premiu d’ensayu centráu nel pensamientu críticu podía ser un apueste tan interesante como necesariu”, continúa Rendueles.

Col certame quier dase puxu a la creatividá crítica, a plantiar respuestes alternatives a les convencionales y salir de la zona de confort intelectual

El Premiu Institutu Asturies 2030 d’Ensayu allúgase nel ámbitu de la reflexón humanística sobre cualquiera de los aspectos de la vida social, política, cultural y del conocimientu científicu. “Buscamos sobre too ensayos dirixíos a un públicu ampliu, que faigan un esfuerciu de creatividá crítica -sin cayer n’obres d’erudición adaémica nin tampoco nel panfletu-; obres que sían quien a facenos pensar; qu’apurran preguntes y respuestes complexes; que nos ayuden a cuestionar les respuestes convencionales, y que nos ayuden a abrir espacios de reflexón que nos saquen de la nuestra zona de confort intelectual”, espón el presidente del Institutu Asturies 2030.

Esta convocatoria entámase dende una entidá asturiana teniendo claro que ye importante la mirada dende esti sitiu: el que se busquen respuestes dende Asturies ye una vía p’abrise a perspectives, puntos de vista o problemátiques diferentes a les que suelen ocupar l’axenda política nes grandes ciudaes, Madrid o Barcelona, onde davezu se presenten esti tipu d’iniciatives. “El qu’esti certame se convoque dende equí yá implica una perspectiva peculiar y da una cierta identidá propia”, comenta César Rendueles.

L’oxetivu ye que se presente xente de toa España, de Llatinoamérica y, lóxicamente, d’Asturies. L’ensayu premiáu va publicase comercialmente cola intención d’algamar al mayor númberu de persones y pa eso cuéntase cola collaboración de la editorial asturiana Hoja de Lata, de reconocíu prestixu y con un apueste pola llinia d’ensayu.

Les obres pueden presentase en castellanu y asturianu ente primeros d’abril y finales de payares d’esti añu. El premiu va consistir na publicación de la obra y una dotación económica de 1.000 euros pal autor o autora del ensayu en conceptu d’adelantu de derechos d’autor. El xuráu va tar fomáu por persones de solvencia profesional nel campu de la edición, l’ensayu, el periodismu, la investigación científica o la creación artística y la so composición va a dase a conocer bien llueu.