Institutu Asturies 2030, un llaboratoriu d’idees y esperiencies

El Muséu Barjola de Xixón acoyó’l vienres 2 de xunu la presentación del Institutu Asturies 2030. El sociólogu y escritor César Rendueles, el so presidente, foi l’encargáu de dar a conocer esta iniciativa que definió como “un llaboratoriu d’idees  y esperiencies”.

Un “llaboratoriu” dende’l que se quier contribuyir a vertebrar iniciatives ciudadanes nel mediu y llargu plazu, el 2030. “Una fecha nin mui llonxana que se vea inalcanzable nin tampoco tan cercana que faiga difícil algamar los oxetivos nun plazu mui curtiu”, esplicó’l profesor de la Universidá Complutense de Madrid.

Los oxetivos, tal como indicó Rendueles, arrinquen de la necesidá de “esparder n’Asturies una cultura democrática sana, activista, constructiva y solidaria”. Pa ello, l’Institutu va a abrir “espacios de reflexón y de comunicación que tracen una estratexa social territorial, económica, política y medioambiental anovadora, sostenible y digna”.

Una de les primeres actividaes del Instiuitu Asturies 2030 ye la Universidá de Primavera, que se celebra n’Uviéu ente’l 22 y el 24 de xunu. Laura Tuero, coordinadora del Institutu y una de les organizadores de la Universidá, animó a participar nesti foru “abiertu y plural d’intercambiu ente les y los distintos ponentes y les persones interesaes en participar”.

Esti añu la Universidá de Primavera pon el focu na Unión Europea y nel so futuru, coincidiendo col 25 aniversariu de la firma del Tratáu de Maastricht y un momentu políticu de cambios grandes nel panorama de la UE: alcuerdos como’l Brexit, la xuba de la estrema derecha o la crisis de les persones refuxaes condicionen un futuru inciertu del que se va a falar nesta primera edición de la Universidá de Primavera.

Na presentación del Institutu Asturies 2030 tamién se dio a conocer el Conseyu Asesor del mesmu, integráu por persones que vienen del activismu social y políticu, la cultura, la creación, la economía la universidá, etc. Ana L. Chicano, vinculada al mundu de la educación, presentó esti órganu dende’l que van salir les propuestes que lleve alantre l’Institutu Asturies 2030.