Presentación Institutu Asturies 2030

Asturies foi siempre un territoriu de munchu dinamismu social y políticu, xenerador d’idees y llaboratoriu de polítiques dende les instituciones que nun siempre llegaron a bon fin (ehí ta la reconversión industrial y minera o l’esfarrapamientu del mediu rural). Pesie a vivir nuna sociedá inquieta, enraigonada y esmolecida pol territoriu, la realidá ye que bien de veces caminóse a ritmu d’improvisaciones y intereses más minoritarios que xenerales.

De la constatación d’esta realidá naz l’Institutu Asturies 2030, dende’l que se quier abrir espacios de reflexón y comunicación dende los que trazar n’Asturies una estratexa social, territorial, económica, política, cultural y medioabiental anovadora, sostenible y digna de ser un referente estatal y internacional nun plazu rondando l’añu 2030.

L’Institutu Asturies 2030 y una de les sos primeres actividaes, la Universidá de Primavera, van presentase esti vienres 2 de xunu a les 18 hores nel Muséu Barjola de Xixón (1ª planta, cai Trinidad 17). La presentación va a facela’l sociólogu y ensayista César Rendueles, presidente del Institutu Asturies 2030, que va tar acompañáu de Laura Tuero, coordinadora de la iniciativa; Diego Díaz, ún de los organizadores de la Universidá de Primavera, y Ana Chicano, del ámbitu de la educación y integrante del Conseyu Asesor del Institutu.